औंढा नागनाथ ते वसमत मार्गावर काठोडा जवळ क्रुझर जीपचा अपघात:नांदेड जिल्ह्यातील 7 जण गंभीर जखमी, हिंगोलीच्या शासकीय रुग्णालयात उपचारासाठी हलवले

औंढा नागनाथ ते वसमत मार्गावर काठोडा शिवारामध्ये वन्य प्राण्याला वाचवताना क्रुझर जीप चालकाचे वाहनावरील नियंत्रण सुटल्याने जीप रस्त्याच्या खाली खड्ड्यात आदळल्याने झालेल्या अपघातात सात भाविक जखमी झाल्याची घटना शनिवारी ता 23 रात्री साडे अकरा वाजण्याच्या सुमारास घडली आहे. सर्व भाविक नांदेड जिल्ह्यातील देगलूर येथील असून त्यांना उपचारासाठी हिंगोलीच्या शासकीय रुग्णालयात दाखल करण्यात आले आहे. पोलिसांनी दिलेल्या माहितीनुसार नांदेड जिल्ह्यातील देगलूर येथील भाविक एका क्रुझर जीपने सैलानी बाबा येथे दर्शनासाठी गेले होते. शनिवारी तारीख 23 दर्शन घेऊन रात्रीच्या सुमारास ते परत देगलूर कडे निघाले होते. त्यांच जीप औंढा नागनाथ ते वसमत मार्गावर काठोडा शिवारात आल्यानंतर समोरून अचानक एक वन्य प्राणी आला. या प्राण्याला वाचवताना चालकाचे वाहनावरील नियंत्रण सुटले आणि जीप रस्त्याच्या खाली जाऊन एका खड्ड्यात आदळली. या अपघातात जीप मधील सात जण जखमी झाले असून यामध्ये अब्दूल रहेमत, राजू परकुटले, सईबाई भुरे, सखुबाई परकुटले, शेख इरफान, मोहसीन पठाण, लक्ष्मीबाई पांढरे यांचा समावेश आहे. या अपघाताची माहिती मिळताच औंढा नागनाथ पोलीस ठाण्याचे पोलीस निरीक्षक गणपत राहिरे, जवळा बाजार चौकीचे सहाय्यक पोलीस निरीक्षक कैलास भगत, जमादार दिलीप नाईक, इम्रानोद्दीन सिद्दिकी, रविकांत हरकाळ, संदीप टाक यांच्या पथकाने घटनास्थळी धाव घेतली. पोलिसांनी सर्व जखमींना तातडीने उपचारासाठी औंढा नागनाथ येथील ग्रामीण रुग्णालयात दाखल केले. त्या ठिकाणी त्यांच्यावर प्राथमिक उपचार करून त्यांना पुढील उपचारासाठी हिंगोलीच्या शासकीय रुग्णालयात हलवण्यात आले आहे. याप्रकरणी औंढा नागनाथ पोलीस ठाण्यात रविवारी सायंकाळपर्यंत नोंद झाली नव्हती.